"Дулаан шарын гол" ТӨХК нь Дархан-Уул аймгийн Шарын гол сумын иргэдийг ус, дулааны эрчим хүчээр хангах, бохир усыг татан зайлуулах үүрэгтэйгээр 1964 онд анх байгуулагдсан түүхтэй. Шарын голын уурхайн харьяа Уурын зуухын цех, Орон сууц, нийтийн аж ахуйн газрын харьяа Шугам сүлжээний хэсгийн зохион байгуулалттайгаар 1992 он хүртэл ажилласан. 1993 онд Шарын гол ХК-ийн харьяа Дулаан үйлдвэрлэл, шугам сүлжээний газар байгуулагдан 2003 он хүртэл аж ахуйн тооцоотой ажиллаж байсан. Монгол Улсын Засгийн газрын 2003 оны 180 дугаар тогтоолоор Орон нутгийн өмчит Улсын Үйлдвэрийн газар болгон өөрчлөн байгуулж ажилласан бөгөөд 2005 оны Дархан-Уул аймгийн Иргэдийн Төлөөлөгчдийн Хурлын 57 дугаар тогтоолоор Орон нутгийн өмчит хувьцаат компанийн хэлбэртэйгээр үйл ажиллагаа явуулж эхэлсэн. 2010 онд Төрийн өмчийн хорооны 121 тогтоолоор төрийн өмчит хувьцаат компанийн хэлбэрт шилжин ажиллах болсон. Шарын гол сумын аж ахуйн нэгж, байгууллага, иргэдийн дулааны эрчим хүч, цэвэр усаар хангах, бохир усыг татан зайлуулах чиг үүрэгтэйгээр ажиллаж байна.